2016年9月29日 星期四

HUAWEI MateBook 體驗之與娜姐約會

多謝HUAWEI邀請參與是次體驗
更可以近距離接觸娜姐,
佢有禮又準時,
對於我哋想同佢合照都來者不拒!
各方面都好專業添!


講返HUAWEI MateBook 
佢又輕又薄,拎出街又唔會好重
可以當手提電腦咁用,
每個鍵都有迴彈觸感,打字都打得快啲啦!


拆開保護套連鍵盤,就變成便攜式手提電腦,
加埋感壓筆,仲可以用嚟畫畫,
細細部隨時隨地寫生都無問題,正呀!

叉足電嘅HUAWEI MateBook 可以用到8-9個鐘
就算無電,充電1個鐘就有60%電量,
唔洗到處搵叉電插頭!


無論係商用或者私用,都一樣咁方便!
HUAWEI MateBook 備有香檳金,
兼備型格品味、高流動性、高效能,以及指紋解鎖功能四大特點
各大零售商及CSL有售
建護零售價為$6999

#HuaweiMobileHK #HuaweiMateBook #NewStyleOfBusiness#HuaweiHK #FunwithMateBook #DrawnbyMateBook


2016年8月14日 星期日

亞媽喺美食博覽2016大出血 $5000!!!

又到一年一度美食博覽喇!
同場仲有家電家品同埋美與健生活博覽添!
星期六下午人好多!!
貿發局實施咗人潮管制
係咁兜兜轉轉,兜咗45分鐘,
終於入到會場喇。。。


一嚟梗係醫肚先啦!
呢個椰王冰成個都好冰,
係咁用匙鋤鋤鋤冰,再食返啲果肉,
雖然椰味唔算濃,但係的確好透心涼
而且一個可以食好耐,邊行邊等啲冰融
都抵食呀!


食咗啲凍嘢,梗係要食返啲熱嘢啦!
見到有檔燒金蠔,買嚟試下
但。。。有啲乾,又唔熱。。。
有啲伏添。。。


我仲有買咗燒帶子,但唔記得影相 :P

反而呢檔近尾嘅土耳其店,唔係好顯眼,但係好抵食!
你睇?$10 一件特色小食,$5一杯土耳其咖啡,
你話喺美食節入面幾抵? 杯咖啡好香濃,
小食由餅皮包住芝士同牛肉腸
喊喊地熱辣辣,好不錯啊!


由於我同亞媽分開日子去
亞媽返到屋企好興奮,仲要開心足幾日,
因為佢喺美食博覽買咗好多嘢,
買咗接近$5000!!! (嚇親)

亞妹無奈話:「梗係啦⋯⋯ 佢買完都唔洗拎
梗係爽賣架!難為我個日做咗「姑尼」咋。。。

唔好問我買咗啲咩,
當我話想睇下啲戰利品,
亞媽話已經全部放得整整齊齊,
唔好攪亂佢喎

不過以我所知,佢買得最多嘅係樂道三七 (好多嘢送)
洗咗$3080

跟住現場又食咗好多美食,
仲買咗好多蔘茸海味、零食等等
例如以下。。。(部份戰利品)


亞媽第二日去格價,話商場個啲都唔夠美食博覽平同靚
好似南非螺頭,百五蚊有八個,一般呢個價錢只有五個,仲要比佢貴!
仲有佢話啲$488花膠仲靚過啲藥材舖喎,邊講邊手舞足蹈


第二日,用黑松露醬點麵包,覺得好HIGH呀!
呢個黑松露含量有8%,比一般嘅多


報告完畢!



2016年8月3日 星期三

【一睇就知.你係咪浪漫底】

話說聽電台節目,有一個研究幾有趣!原來睇一個男仔夠唔夠浪漫,就可以睇下佢隻食指係咪短過無名指,兩者相距越大,就代表佢越浪漫。

咁如果女仔食指短呢?咁即係代表佢man 底囉!
信不信由你,歡迎Share 

2016年7月26日 星期二

【畫畫的秘密】


有人問我點畫「點陣畫」,
其實我都係上網畫畫!
呢個網站超易用,仲要係免費!
《童年同樂》入面啲點陣圖都係靠佢
學生哥放暑假無嘢做,
可以上去畫下畫喎!^_^

http://makepixelart.com/free/#

2016年7月23日 星期六

【插畫】 有無朋友試過行街唔踩界?

 有無朋友試過行街唔踩界?

最近玩得 Steppy Pants 多,
返到現實見到地下格仔都唔覺意玩埋「唔踩界」一份
HEE

2016年7月4日 星期一

【漫畫】收「兵」

天氣熱辣辣,自己帶水最環保又健康!
不過你哋鍾意喺屋企/茶餐廳將「兵」收歸「國有」嗎?

2016年6月28日 星期二

【你揀邊款?ROUND3】朱古力,鮮奶、朱古力奶

上回問大家鐘意阿華田、美祿、朱古力多啲,
結果朱古力以多30票之差贏咗阿華田,
哈哈~~~ 
今次繼續以朱古力做主角,
同鮮奶比較,
大家又會揀邊樣?

其實我幾鐘意飲鮮奶架,
不過我會揀朱古力奶多啲~咁你呢


2016年6月23日 星期四

【你揀邊款?ROUND2】美祿、阿華田、朱古力

【你揀邊款?ROUND2】美祿、阿華田、朱古力
說話上一回簡直大跌眼鏡!
估唔到大多數人會揀阿華田多過揀好立克!
好啦,順應民意,
就由阿華田繼續比較啦!

以下三款啡色飲品,
你又會點揀?
最高民意嘅飲品會冧莊成為下一回角色 


2016年6月20日 星期一

【你喜歡好立克還是阿華田?】

基本上我兩款都鐘意,但我卻偏愛好立克多啲!
好可惜好多茶餐廳嘅好立克都好淡味(可能成本貴落得少粉?)
就算同侍應反映佢再沖都係無改變。。。

我比較鐘意飲大快活嘅好立克,香濃好味!(奶茶都一樣靚!)
咁你哋又鐘意好立克定柯華田多啲?


2016年6月9日 星期四

2016年6月6日 星期一

【丼丼屋】在香港也能吃到的日本美味

日前去丼丼屋看見他們推出了來自北海道利尻島食堂丸善的「名物海膽丼」,更要每日每店限定 30 份,問過店員後便叫了一份來試試。
平常我們吃的海膽飯多數是刺身海膽飯,在白米上加海膽刺身,但這個「名物海膽丼」卻不是刺身飯,而是以利尻島特產的昆布及海膽熬煮的高湯煮米飯,再在上面鋪上蒸海膽。在口裡細味米粒,讓我感受到啖啖海洋氣息。


原來這個名物丼是日本電視台與東京巨蛋合作「日本丼物選手權」引入的「名物海膽丼」!香港少有,可以一試啊!




此外,我還喜愛這個芝士玉子燒!
看到拉絲芝士嗎?




夏日炎炎,順便喝了一杯藍莓乳酸沙冰,沙冰的藍莓味道濃郁,味道像是「喝得的藍莓味雪糕」,透心涼,上面更放了幾粒新鮮藍莓,真的是相當消暑的選擇。



名物海膽丼於丼丼屋全線限量發售 (每店每日限定30食)
販賣時間:即日起至8月23日

2016年6月1日 星期三

【有聲POST】是來自哪套卡通片?


【有聲POST】究竟有幾多人睇過呢套卡通片?試下用一句嚟來形容呢套卡通片啦?

2016年5月18日 星期三

2016年5月1日 星期日

【只有80後女生先明嘅~LEON LEON LEON】


【只有80後女生先明嘅~LEON LEON LEON】
在我成長路上,我對黎明的認識大致分為三個階段:
1. 細個覺得佢好靚仔,唱情歌又好聽,《傻痴痴》、《今生不再》、《夏日傾情》等等都瘋摩唔少女同學。
2. 到千嬉年左右,我就覺得佢係潮流先峰,佢當時嘅MV《全日愛》、《睛眼想旅行》、《聽身體唱歌》、《越夜越有機》等等進化系列,無論音樂定MV都好潮,同學仔去前衛、GREENBOX 唱K必點,而且佢幫和記拍嘅一系列手機電視廣告(大致係微電影前身?)都好好睇。
3. 到呢幾年人人叫佢金句王,尤其係佢開FACEBOOK只係幾個月,FANS更可以「立體地」了解佢,我覺得佢好有智慧,而且諗嘢好正面,解決問題比一眾高官更好,係好值得大家去學習!

今年4D演唱會我係期待的,始終唔係咁多藝人大膽嘗試新玩法。雖然最後只係半成功,不過都無損FANS嘅熱情,「那些年」都返晒嚟!黎明GOOD LUCK!KEEP住微笑!GOOD SHOW!!!

2016年4月20日 星期三

【插畫】 屋與花

這個城市滿佈各式各樣的花花,
有美麗而帶點邪惡的,
有怕受傷害而帶著荊棘的,
有沉默得長出菇菇的,
有醜陋卻心地善良的⋯

花花以不同角色穿插在城市裡,
就是等待一個合適的家,
讓它展現最好的一面,
漂亮地盛開著吧!


2016年3月20日 星期日

【插畫】 柚子酒招紙


很開心前幾日經 HarbourCity 介紹,認識了來自日本奈良的清酒五神釀造元五條酒𨑳株式會社的中元社長先生!他是第一次來香港推廣清酒啊!

他的酒莊是家庭式經營,釀造了這支非常容易入口,似柚子汁的柚子酒,我很喜歡這味道,但願他的柚子酒能夠推廣全世界呢!

最驚喜是社長先生邀請我幫他設計酒的招紙,那我就不客氣畫了這張可愛柚子酒招紙吧!嘻嘻!非常適合女士品嚐呢!

不知我畫的這張招紙,將來會否成為限定版呢~呵呵!

2016年2月28日 星期日

【漫畫】草泥馬與我

草泥馬太熱情了!長頭髮女生敬請先束起頭髮,不然小心被誤會頭髮是草啊。。。UMMMMM

2016年2月17日 星期三

【插畫】溫泉會席料理

我最喜歡去日本溫泉旅館,每次都很期待「會席料理」,十多道精美小吃,由前菜至甜品,碟碟精緻,大飽眼福,吃完很滿足!

2016年2月1日 星期一

【漫畫】好FREE呀!

你有無試過?我真係試過!
既然唔係咁「突出」,就算啦XD 

如果比著你,又會點做呢?

2016年1月19日 星期二

【漫畫】我想看雪呀!


今日台灣都落雪喇 如果香港星期日真係落雪又會點呢?(發夢ing) o雪o雪o雪~~~~ via Princess Ceci http://ift.tt/1Zy7lCO

2016年1月16日 星期六

活動花絮:【美人の赤苺】陶瓷彩繪體驗活動 (多相)

好開心今晚嚟到東海堂出席【美人の赤苺】陶瓷彩繪體驗活動!


大家都知呢期最紅係草莓蛋糕!嘩~ 今期東海堂出咗咁多款草莓甜品,由邊款食先好呢?





之不過我今次嚟係學嘢架!
主辦單位邀請咗「日本皇家瓷器彩繪」導師,教大家製作陶瓷彩繪手藝!先由導師示範點樣喺陶瓷畫畫!


首先將陶瓷顏料開稀少少,
然後以海綿代替筆,沾上顏料,喺碟上印印印,
印出你想要嘅圖案 (好似油顏色咁)
然後再用筆劃走出咗界嘅顏料

導師話先薄薄地畫一層,
再燒,再畫多層再燒
咁樣啲顏色先會深



好喇!到我表演喇!畫畫都算係我強項!
好可惜。。。
今次改用拼貼裝飾碟面
其實我做手工差過畫畫架~~~HAHAHHAHA


導師每人派發一隻白色碟同一份材料包
入面有好多轉移圖案紙,
有花花、草莓、葉等等,好靚呀!
你可以隨意剪你嘅圖案,
拼拼貼貼成你想要嘅裝飾圖案!



1. 先噴上酒精,清潔白碟
2. 從一堆轉移紙上剪下你想要嘅圖案
3. 喺碟上試下拼
4. 然後將轉移紙逐塊浸過水10秒左右
5. 等大約20秒,待轉移紙同圖案分離後
5. 貼在碟面上
6. 用筆輕輕捽走圖案內嘅多餘水份
7. 重覆2-6步驟


一塊一塊再一塊
不經不覺,我嘅靚靚蝶就半完成喇!

之後就要麻煩導師幫我再陶瓷燒
待顏色蝕咗入碟,
咁我隻靚靚碟就真正完成,
可以「入得廚房,出得廳堂」!

=========================

體驗完日本藝術嘅美學,

大會就比我哋試下
【美人の赤苺】蛋糕甜品系列! 正呀!



主打緊係「美人之赤莓」(官方相)
日本草莓慕絲蛋糕
呢個好重份量,足足有1.6磅架!



你睇?來自日本直送嘅新鮮赤莓
上面仲襯埋金箔,好貴氣!
草莓特別甜美 ^__^



唔好睇外面好似好簡單,
入面原來有好多層架,夠精緻!

軟錦錦嘅蛋糕、又有脆脆粒,仲有淡淡嘅草莓慕絲,夾雜著酸酸甜甜嘅草莓醬,
層次好豐富,啖啖士多啤梨!好好味呀!



此外,後面叫「赤莓之卷」,賣相好可愛!
粒粒果肉仲有綿綿嘅慕絲同蛋糕,好清新!

而前面個個叫「赤莓之果園」
即係鮮草莓果撻
上面好多粒草莓,底層係鬆脆曲奇加海綿蛋糕同鮮忌廉!



呢杯叫「赤莓之思慕」
即係草莓慕絲!
我覺得最好嘅食法係
一匙由面刮到底! (唔好一層層食呀)

因為上面係淡味嘅慕絲,中間有層草莓果凍,下面係酸甜嘅草莓醬
仲有海綿蛋糕層

咁食先食到香甜嘅豐富層次!下午茶之選,推介!


呢晚完全被草莓包圍住!好滿足!哈哈


=========================

過咗幾日後,提早同爸爸慶祝生日
忍唔住再食多次
「美人之赤莓」嘿嘿!

去到東海堂,店員話未翻貨,
因為係新鮮製造,叫我哋4點再嚟拎!



家人都好鍾意呢個蛋糕!
啲金箔草莓比晒爸爸,祝佢財源滾滾XDD

爸爸好滿足,仲同媽媽用手機影蛋糕留念回味添!